आम सञ्चार क्षेत्रलाई जिम्मेवार बनाउँदै राष्ट्र निर्माणमा लगाउनु पर्छ : पूर्वमुख्यमन्त्री राई

विराटनगर- नेकपा एमाले स्थायी कमिटी सदस्य एवं कोशी प्रदेशका पूर्वमुख्यमन्त्री शेरधन राईले मुलुकको आम सञ्चार क्षेत्रलाई जिम्मेवार बनाउँदै राष्ट्र निर्माणको काममा लगाउनु पर्ने बताएका छन्।

आइतबार विराटनगरमा प्रेस चौतारी नेपालको १० औं केन्द्रीय महाधिवेशनको उद्घाटन कार्यक्रमलाई सम्बोधन गर्दै राईले आमसञ्चारले लोकतन्त्र र गणतन्त्रको रक्षाका लागि काम गर्नुपर्ने बताए। ‘आम जनताले प्रेस चौतारी नेपाल माथि यो आस्था र विश्वास राखेका छन्’, उनले भने। 

लोकतन्त्रबाट प्राप्त उपलब्ध अधिकारलाई अहिले कुल्चन प्रयास भइरहेको उनले बताए। यस विषयमा आम नागरिकलाई सचेत गराउन आवश्यक रहेको उनले स्पष्ट पारे। यसले मात्र आम जनतामा लोकतन्त्रप्रति विश्वास जाग्ने उनको धारणा छ। 

नेकपा एमाले समाजवादका सम्पूर्ण आधार निर्माण गरेर समृद्ध नेपाल, सुखी नेपालीका आकाङ्क्षा पुरा गर्ने सङ्कल्पका साथ लागेको उनले बताए। यसका लागि प्रेस चौतारी नेपालले निक्कै महत्त्वपूर्ण भूमिका खेल्नु पर्नेमा राईले जोड दिए।

आफू सञ्चार मन्त्री हुँदा श्रमजीवी पत्रकारको हितका पक्षमा धेरै काम गरेको राईले बताए। छोटो अवधिमा पनि नेपालको सूचना र प्रविधिको विकास र पत्रकारिताको विकासमा आफूले धेरै काम गरेको राईले दाबी गरे। यसको पछाडि प्रेस चौतारी नेपालको ठूलो योगदान रहेको उनले स्पष्ट पारे। 

मुलुकको गम्भीर परिस्थितिलाई विश्लेषण गर्दै देशका सामु रहेका चुनौती कसरी चिर्न सकिन्छ भन्ने बारेमा प्रेस चौतारी नेपाल सचेततापूर्वक उभिनु पर्ने राईले बताए। आम नागरिकलाई सचेत र संगठित बनाउँदै संघीय लोकतान्त्रिक गणतन्त्रको पक्षमा जनमत सिर्जना गर्नुपर्नेमा उनले जोड दिए।