देवानगञ्जमा ३ लाख ८ हजारको भन्सार छलीका अवैध लत्ताकपडा बरामद

सुनसरी, साउन २९ गते।

सुनसरीको देवानगञ्ज गाउँपालिका–२ बाट प्रहरीले भन्सार छली गरी भारतबाट नेपालतर्फ ल्याउँदै गरेको करिब ३ लाख ८ हजार रुपैयाँ बराबरको अवैध लत्ताकपडा बरामद गरेको छ।

जिल्ला प्रहरी कार्यालय सुनसरीका अनुसार साउन २८ गते साँझ करिब ६ः१० बजे इलाका प्रहरी कार्यालय देवानगञ्जबाट खटिएको प्रहरी टोलीले देवानगञ्ज गाउँपालिका–२ स्थित क्षेत्रमा भारतबाट नेपालतर्फ ल्याउँदै गरेको अवस्थामा उक्त लत्ताकपडा बरामद गरेको हो।

प्रहरी टोलीलाई देखेपछि अवैध सामान ल्याउने व्यक्तिहरू सामान छाडेर फरार भएको वा सामानसहित पक्राउ परेको भन्ने विवरण विज्ञप्तिमा उल्लेख छैन।

बरामद गरिएको लत्ताकपडा आवश्यक कारबाहीका लागि इलाका प्रहरी कार्यालय देवानगञ्जमा ल्याइएको प्रहरीले जनाएको छ।

बरामद सामानको अनुमानित मूल्य ३ लाख ८ हजार रुपैयाँ रहेको छ। उक्त सामानलाई आवश्यक प्रक्रिया पूरा गरी सुनसरी भन्सार कार्यालय, सेतुबन्ध पठाउने कार्य भइरहेको जिल्ला प्रहरी कार्यालय सुनसरीका सूचना अधिकारी प्रहरी नायव उपरीक्षक चन्द्रबहादुर खड्काले जानकारी दिएका छन्।