झापा र सुनसरीबाट ब्राउन सुगरसहित चार जना पक्राउ

विराटनगर, भदौ ३० गते ।

झापा र सुनसरीबाट प्रहरीले ब्राउन सुगरसहित चार जनालाई पक्राउ गरेको छ।

प्रहरीका अनुसार भदौ २९ गते झापाको मेचीनगर नगरपालिका–६ मा चेकजाँच गर्ने क्रममा लागूऔषध नियन्त्रण ब्यूरो काँकरभिट्टा र इलाका प्रहरी कार्यालय काँकरभिट्टाको टोलीले बिर्तामोड नगरपालिका–८ का २८ वर्षीय विजय राजवंशीलाई ३ ग्राम १४० मिलिग्राम ब्राउन सुगरसहित पक्राउ गरेको हो।

त्यस्तै, वडा प्रहरी कार्यालय भद्रपुरको टोलीले बिर्तामोड नगरपालिका–३ का कुरबान शेखलाई ३ ग्राम ६२ मिलिग्राम ब्राउन सुगरसहित पक्राउ गरेको प्रहरीले जनाएको छ।

यसैगरी, सुनसरीमा इलाका प्रहरी कार्यालय महेन्द्रनगर र प्रहरी चौकी मधुवनबाट खटिएको संयुक्त टोलीले चेकजाँचका क्रममा को.३१ प ८८८५ नम्बरको स्कुटरमा सवार धरान उपमहानगरपालिका–१७ का हेम राई र जयबहादुर खड्गीलाई १ ग्राम ३८ मिलिग्राम ब्राउन सुगरसहित नियन्त्रणमा लिएको छ।

प्रहरीले पक्राउ परेका चारै जनामाथि लागूऔषधसम्बन्धी आवश्यक अनुसन्धान तथा कानुनी प्रक्रिया अघि बढाइएको जनाएको छ।