राम्रो कामको सम्मान: १२ लाखको RCC ढलान योजनाले जित्यो स्थानीयको विश्वास

कैलाश माझी / सप्तरी
सार्वजनिक निर्माणका काममा अनियमितता, गुणस्तरहीन निर्माण तथा राज्यको बजेट दुरुपयोगका घटना बारम्बार सार्वजनिक भइरहेका बेला सप्तरीको सप्तकोशी नगरपालिका वडा नं. ५ मा सम्पन्न भएको एक आरसीसी ढलान योजनाले भने सकारात्मक सन्देश दिएको छ।

मधेश प्रदेश सरकार, भौतिक पूर्वाधार विकास मन्त्रालयअन्तर्गत पूर्वाधार विकास निर्देशनालय, पूर्वाधार विकास कार्यालय, सप्तरीको आर्थिक सहयोगमा सञ्चालन गरिएको "सप्तरी, सप्तकोशी नगरपालिका वडा नं. ५ स्थित फुलदेव राउतको घर हुँदै महादेव मण्डलको घर हुँदै मोहन मण्डलको घरसम्म RCC ढलान" योजना निर्धारित समयभित्र गुणस्तरीय रूपमा सम्पन्न भएको पाइएको हो।

उक्त योजनाको कुल लागत रु. १२ लाख ३५ हजार ४३३ रहेको थियो। जसमध्ये रु. ११ लाख ७३ हजार ६६१.४० पूर्वाधार विकास कार्यालय, सप्तरीले व्यहोरेको छ भने रु. ६१ हजार ७७१.६५ जनसहभागिताबाट जुटाइएको थियो। योजनाको सम्झौता २०८३ जेठ ८ गते भएको थियो भने २०८३ असार १५ गते सम्पन्न गर्ने लक्ष्य समयमै पूरा गरिएको हो। योजनाको उपभोक्ता समितिका अध्यक्ष सुरेश कुमार मण्डल रहेका छन्।

सप्तकोशी नगरपालिका वडा नं. ५ को गंगाजली धार टोलमा निर्माण गरिएको उक्त आरसीसी ढलानको स्वीकृत इस्टिमेटअनुसार लम्बाइ ९८ मिटर, चौडाइ ४ मिटर तथा मोटाइ ६ इन्च रहने उल्लेख थियो। तर स्थलगत अनुगमनका क्रममा ढलानको वास्तविक लम्बाइ १०० मिटर अर्थात् इस्टिमेटभन्दा २ मिटर बढी तथा मोटाइ ७ इन्च अर्थात् १ इन्च बढी रहेको भेटिएको छ।

निर्धारित समयसीमाभित्रै इस्टिमेटभन्दा बढी काम सम्पन्न गर्नुका साथै निर्माणको गुणस्तर र फिनिसिङसमेत उत्कृष्ट रहेको स्थलगत अवलोकनबाट देखिएको छ। यसले उपभोक्ता समितिले उपलब्ध बजेटको प्रभावकारी उपयोग गर्दै गुणस्तरीय पूर्वाधार निर्माणमा जिम्मेवारीपूर्वक काम गरेको पुष्टि गर्दछ।

सार्वजनिक निर्माणमा गुणस्तर कायम गर्नु, समयमै काम सम्पन्न गर्नु र नागरिकको विश्वास जित्नु प्रत्येक उपभोक्ता समिति तथा निर्माण पक्षको दायित्व हो। उक्त योजनाले त्यसको व्यवहारिक उदाहरण प्रस्तुत गरेको देखिन्छ। विकास निर्माणका क्षेत्रमा काम गर्ने अन्य उपभोक्ता समितिहरूले पनि यसबाट सकारात्मक शिक्षा लिन सक्ने स्थानीयको अपेक्षा छ।

हामीले विगतदेखि नै सार्वजनिक निर्माणमा हुने अनियमितता, गुणस्तरहीन काम र भ्रष्टाचारविरुद्ध निरन्तर आवाज उठाउँदै आएका छौँ। जहाँ राज्यको बजेटको दुरुपयोग हुन्छ, त्यहाँ तथ्यका आधारमा प्रश्न उठाउनु हाम्रो दायित्व हो। त्यसैगरी, जहाँ इमान्दार, पारदर्शी र गुणस्तरीय काम हुन्छ, त्यहाँ खुलेर प्रशंसा गर्नु पनि उत्तिकै आवश्यक हुन्छ।

सार्वजनिक विकास निर्माणमा राम्रो काम गर्ने उपभोक्ता समिति र सरोकारवाला निकायलाई प्रोत्साहन गर्न सके मात्र गुणस्तरीय विकास निर्माणको संस्कृति स्थापित हुन सक्छ। सप्तकोशी–५ को यो योजना त्यसतर्फको एक प्रेरणादायी उदाहरण बनेको छ।

निष्कर्ष

पत्रकारिता र नागरिक निगरानीको उद्देश्य केवल कमजोरी र अनियमितता उजागर गर्नु मात्र होइन, राम्रो कामको पहिचान र सम्मान गर्नु पनि हो। जहाँ सार्वजनिक सम्पत्तिको दुरुपयोग हुन्छ, त्यहाँ तथ्यका आधारमा खबरदारी आवश्यक हुन्छ। तर जहाँ इमान्दारी, पारदर्शिता, गुणस्तर र जिम्मेवारीका साथ विकास निर्माण सम्पन्न हुन्छ, त्यस्ता प्रयासलाई खुलेर प्रशंसा गर्न पनि कञ्जुस्याइँ गर्नु हुँदैन।

सप्तकोशी नगरपालिका–५ को यो RCC ढलान योजना सार्वजनिक निर्माणमा गुणस्तर, समयपालन, पारदर्शिता र जिम्मेवारी सम्भव छ भन्ने सकारात्मक उदाहरण बनेको छ। यस्ता अभ्यासलाई निरन्तरता दिन सकिए विकास निर्माणप्रति नागरिकको विश्वास अझ बलियो बन्नुका साथै अन्य उपभोक्ता समितिहरू पनि गुणस्तरीय र उत्तरदायी कार्य गर्न प्रेरित हुने अपेक्षा गर्न सकिन्छ।